Infanriks

QOʻLLASH BOʻYICHA YOʻRIQNOMA

INFANRIKS^TM

INFANRIX^TM

Boʻgʻma-qoqshol-koʻkyoʻtal vaksinasi

(xujayrasiz koʻkyoʻtalli komponent)

Preparatning savdo nomi: Infanriks^{TM Инфанрикс}

Dori shakli: inyeksiya uchun suspenziya

Tarkibi:

1 doza (0,5 ml) suspenziya quyidagilarni saqlaydi:

faol modda: boʻgʻma anatoksini kamida 30 XB, qoqshol anatoksini kamida 40 XB, koʻkyoʻtal anatoksini kamida 25 mkg, filamentoz gemagglyutinin 25 mkg, pertaktin (tashqi membrana oqsili 69 kDa) 8 mkg;

yordamchi moddalar: alyuminiy gidroksidi 0,5 mg, natriy xloridi 4,5 mg, inyeksiya uchun suv 0,5 ml gacha.

Formaldiyegid va Polisorbat 80 ishlab chiqarish jarayoni tufayli qoldiq miqdorlarda mavjud.

Taʼrifi: loyqa oq, sekin choʻkuvchi, oq choʻkma va choʻkma ustki tiniq suyuqlikka ajraluvchi suspenziya. Silkitilganda choʻkma toʻliq aralashib ketadi.

Farmakoterapevtik guruhi: bakterial vaksinalar

ATX kodi: J07AJ52.

Farmakologshik xususiyatlari

Infanriks^TM vaksinasi alyuminiy tuzlarida adsorbsiyalangan boʻgʻma anatoksini, qoqshol anatoksini va tozalangan uchta koʻkyoʻtal antigeni [koʻkyoʻtal anatoksini (RT), filamentoz gemagglyutinin (FHA) va tashqi membroana oqsili – pertaktin (69 kDa)] saqlaydi.

Corynobacterium diphtheriae va Clostridium tetani kulturalaridan olingan boʻgʻma va qoqshol toksinlari detoksikatsiya qilinadi va tozalanadi.

Vaksinaning xujayrasiz koʻkyoʻtal komponentlari (RT, FHA va pertaktin) Bordetella pertussis kulturasining 1 fazasida oʻstirish natijasida olingan boʻlib, undan ekstraksiya qilib olinadi, tozalanadi va formaldegid bilan ishlov beriladi. Koʻkyoʻtal anatoksini (RT) qaytmas detoksikatsiya jarayonidan oʻtadi.

Vaksina komponentlari boʻgʻma anatoksini, qoqshol anatoksini va koʻkyoʻtalning xujayrasiz komponentlari alyuminiy tuzlarida adsorbsiyalanadi. Tayyor vaksina tuzli eritmada hosil qilinadi.

Infanriks^TM vaksinasi Jaxon Sogʻliqni Saqlash Tashkilotining biologik substansiyalar va boʻgʻma qoqshol vaksinalarni ishlab chiqarish boʻyicha talablariga muvofiq keladi. Vaksinani ishlab chiqarishda odamdan olinadigan substansiyalar ishlatilmaydi.

Farmakodinamikasi

Infanriks^TM vaksinasi bilan birlamchi immunizatsiyaga immun javobi.

Hayonining birinchi 5 oyida uchta doza bilan oʻtkazilgan birlamchi immunizatsiya kursidan keyin 1 oydan soʻng, Infanriks^TM vaksinasi bilan vaksinatsiya qilingan 99% dan ortiq goʻdaklarda, boʻgʻma va qoqshol anatoksinlariga antitelolarning titri 0,1 XB/ml dan koʻproqni tashkil qiladi. Vaksina RT, FHA va pertaktin antigenlarini saqlagan boʻlib, ular organizmni koʻkyoʻtal bilan kasallanishidan himoya qilishda muhim rol oʻynaydi deb hisoblanadi. Klinik tadqiqotlarning natijalari boʻyicha koʻkyoʻtal antigenlariga 95% dan ortiq vaksinatsiya qilinganlarda antitelalar ishlab chiqariladi.

 

Infanriks^TM vaksinasi bilan buster immunizatsiyaga immun javobi.

Hayotining ikkinchi yilida (13 oydan 24 oygacha) Infanriks^TM vaksinasining buster dozasi yuborilganidan keyin, Infanriks^TM vaksinasi bilan birlamchi immunizatsiya qilingan barcha bolalarda boʻgʻma va qoqshol anatoksinlariga nisbatan antitelolarning titri 0,1 XB/ml dan ortiqni tashkil qiladi. Infanriks^TM vaksinasining buster dozasi bilan vaksinatsiya qilinganlarning 96% dan koʻprogʻida koʻkyoʻtal antigenlariga nisbatan antitelolar ishlab chiqariladi.

Infanriks^TM vaksinasining himoyaviy samaradorligi

JSST taʼrifiga koʻra, tipik koʻkyoʻtalga (laborator tasdiqlangan paroksizmal yoʻtalning ≥ 21 kuni) qarshi Infanriks^TM vaksinasining himoyaviy samaradorligi, quydagilarda namoyish qilingan:

• Germaniyada oʻtkazilgan oilaviy kontaktlarni oʻrganish yuzasidan prospektiv yashirin tadqiqotda (3, 4 va 5 oylar sxemasi boʻyicha). Tipik koʻkyoʻtal bilan xastalangan bemor boʻlgan oilalardagi ikkilamchi kontaktlarni oʻrganish natijasida toʻplangan maʼlumotlar asosida aniqlangan vaksinaning himoyaviy samaradorligi 88,7% ni tashkil qilgan. 14 va koʻproq kunli xar qanday tur yoʻtal sifatida belgilangan yengil, laborator tasdiqlangan kasallikdan himoya 73% ni, 7 va koʻproq kunli har qanday tur yoʻtalli – 67% ni tashkil qilgan.
• Italiyada oʻtkazilgan, Sogʻliqni Saqlash Milliy Instituti (NIH) homiylik qilgan (2, 4 va 6 oylar sxemasi boʻyicha) samaradorlikni oʻrganish boʻyicha tadqiqotda, vaksinaning samaradorligi 84% ni tashkil qilgan. Koʻkyoʻtalni aniqlash kengaytirilganda va yoʻtalning turi va davomiyligiga qarab, yengil klinik holatlar xam qoʻshilganda, Infanriks^TM vaksinasining samaradorligi 7 va ortiq kun davom etuvchi har qanday turdagi yoʻtal uchun 71% ni, va davomiyligi ≥14 kunlik xar qanday turdagi yoʻtal uchun 73% ni tashkil qilgan.

Farmakokinetikasi

Vaksinaning farmakokinetik xususiyatlarini baxolash talab qilinmaydi.

Xavfsizlik boʻyicha klinika oldi maʼlumotlari

Xavfsizlik boʻyicha tegishli testlar oʻtkazilgan.

 

Qoʻllanilishi

Infanriks^TM vaksinasi 2 oylik va undan katta yoshdagi bolalarni boʻgʻma, qoqshol va koʻkyoʻtalga qarshi faol birlamchi immunizatsiyasi uchun qoʻllaniladi.

Infanriks^TM vaksinasi xujayrasiz (DTPa) yoki butunxujayrali koʻkyoʻtal-boʻgʻma-qoqshol vaksinasining (DTPw) uch yoki toʻrt dozalari bilan ilgari immunizatsiya qilingan bolalarni buster immunizatsiyasi uchun qoʻllaniladi.

 

Qoʻllash usuli va dozalari

Vaksinaning tavsiya etilgan bir martalik dozasi 0,5 ml ni tashkil qiladi.

Turli mamlakatlar vaksinatsiyaning turli sxemalarini ishlatishlari tufayli, xar bir aloxida mamlakat uchun, milliy tavsiyalarga muvofiq keluvchi vaksinatsiya sxemasi ishlatilishi mumkin.

Vaksinatsiyaning birlamchi kursi vaksinaning 3 ta dozasini tashkil qiladi, buster dozalar hayotning ikkinchi va oltinchi yillarida buyuriladi.

Infanriks^TM vaksinasini mushak ichiga chuqur yuborish kerak.

Infanriks^TM vaksinasi trombotsitopeniyasi yoki qon ivish tizimini buzilishlari boʻlgan patsiyentlarga aloxida ehtiyotkorlik choralariga amal qilgan holda yuborilishi kerak, chunki vaksina mushak ichiga yuborilganidan keyin bunday patsiyentlarda qon ketishi yuz berishi mumkin; inyeksiyadan keyin kamida 2 minut davomida inyeksiya joyini yetarli darajada bosib (ishqalamasdan) turilishini taʼminlash lozim.

Infanriks^TM vaksinasini hech qanday vaziyatlarda vena ichiga yuborish mumkin emas.

 

Qoʻllash, muomala va utilizasiya qilish boʻyicha yoʻriqnoma

Infanriks^TM vaksinasi qanday qoʻllanadi

Infanriks^TM vaksinasi oq loyqa suspenziyadir. Saqlanganda oq choʻkma va tiniq choʻkma usti suyuqlik hosil boʻlishi mumkin. Ishlatish oldidan bir xil, loyqa oq suspenziya hosil boʻlgunicha vaksinani yaxshilab silkitish va yot zarrachalar yoki tashqi koʻrinishi oʻzgarmaganligi yuzasidan vizual tekshirish kerak. Yot zarrachalar aniqlangan yoki tashqi koʻrinishini oʻzgarishi aniqlangan hollarda, vaksinani ishlatish mumkin emas.

Infanriks^TM va Xiberiks^TM vaksinalari qanday aralashtiriladi

Infanriks^TM vaksinasi Xiberiks^TM vaksinasini tiklash va bir vaqtda bir inyeksiya koʻrinishida buyurish uchun ishlatilishi mumkin. Xiberiks^TM bir flakonda oq rangli Hib granulasi va ikkinchi flakonda yoki oldindan toʻldirilgan shprisda tiniq rangsiz steril erituvchidan (fiziologik eritma) iborat vaksinadir. Erituvchi tashlab yuboriladi. DTPa-Hib majmuaviy vaksina  Infanriks^TM vaksinasi bilan oldindan toʻldirilgan monodozali shpris ichidagisining xammasini, Xiberiks^TM oq granulasini saqlovchi monodozali flakonga qoʻshish yoʻli bilan olinishi mumkin. Infanriks^TM Xiberiks^TM ga qoʻshilganidan keyin, Xiberiks^TM oq granulalari  Infanriks^TMsuspenziyasida toʻliq erigunicha aralashmni yaxshilab silkitish kerak. Tiklangan majmuaviy vaksinani yuborish oldidan yot zarrachalar va/yoki fizik xususiyatlarnini oʻzgarishlari yoʻqligi yuzasidan sinchiklab koʻzdan kechirish kerak. Yot zarrachalar yoki tashqi koʻrinishini oʻzgarishi aniqlangan hollarda, vaksinani ishlatish mumkin emas.

Vaksinani yuborish uchun yangi igna ishlatilsin. Vaksina tiklanganidan keyin darxol ishlatilishi kerak.

 

Nojoʻya taʼsirlari

Klinik tadqiqotlardan olingan maʼlumotlar

Quyida berilgan xavfsizlik profili, 11400 dan ortiq patsiyentlarda olingan maʼlumotlarga asoslangan.

Xujayrasiz koʻkyoʻtal-boʻgʻma-qoqshol (DTPa) yoki xujayrasiz koʻkyoʻtal-boʻgʻma-qoqshol komponentlarini saqlovchi vaksina Infanriks^TM vaksinasining buster dozasi yuborilgadan keyin qoʻllanganida, vaksinatsiyaning birlamchi kursiga qaraganda maxalliy reaksiyalar va isitma holatlari tez-tezligini oshishi kuzatilgan.

Bir dozaga nojoʻya reaksiyalar tez-tezligi quydagi tarzda aniqlanadi:

juda tez-tez (≥10%),

tez-tez (≥1% va <10%),

baʼzida (≥0,1% va <1%),

kam hollarda (≥0,01% va <0,1%),

juda kam hollarda (<0,01%).

Qon va limfatik tizimi tomonidan

Juda kam hollarda – limfadenopatiya¹

Moddalar almashinuvi tomonidan

Tez-tez – ishtahani yoʻqolishi²

Ruxiyat tomonidan

Juda tez-tez – taʼsirchanlik

Tez-tez – bezovtalik², odatdagi boʻlmagan yigʻi

Nerv tizimi tomonidan

Juda tez-tez – uyquchanlik

Baʼzida – bosh ogʻrigʻi¹

Nafas tizimi, koʻkrak qafasi va koʻks oraligʻi aʼzolari tomonidan

Baʼzida – yoʻtal¹, bronxit¹

Meʼda-ichak yoʻllari tomonidan

Tez-tez – diareya yoki qusish kabi meʼda-ichak yoʻllari faoliyatini buzilishlari

Teri va teri osti toʻqimalari tomonidan

Tez-tez – qichishish

Baʼzida – toshma

Kam hollarda – eshakemi

Umumiy buzilishlar va yuborish joyidagi buzilishlar

Juda tez-tez – inyeksiya qilingan joyda qizarish, shish (≤50 mm), isitma ≥38^oS

Tez-tez – inyeksiya qilingan joyda ogʻriq², shish (>50 mm)

Baʼzida – inyeksiya qilingan joyda reaksiyalar, shu jumladan inyeksiya qilingan joyda zichlashish, charchoqlik xissi¹, isitma ≥39,1^oS, yaqindagi boʻgʻimni³ qoʻshilishi bilan kechuvchi inyeksiya qilingan joyda diffuz shish.

Postmarketing kuzatuvlar

Qon va limfatik tizimi tomonidan

Trombotsitopeniya⁴

Immun ttizimi tomonidan

Allergik reaksiyalar, shu jumladan anafilaktik va anafilaktoid reaksiyalar

Nerv tizimi tomonidan

Vaksina yuborilganidan keyin 2-3 kun davomida kollaps yoki shoksimon holatlar (gipotonik-giporeaktiv epizod), tirishishlar (isitma bilan yoki usiz).

Nafas tizimi, koʻkrak qafasi va koʻks oraligʻi aʼzolari tomonidan

Apnoe (muddatidan oldin (gestatsiyaning ≤28 haftasida) tugʻilgan bolalardagi apnoe yuzasidan Maxsus koʻrsatmalar boʻlimiga qarang).

Teri va teri osti toʻqimalari tomonidan

Angionevrotik shish

Umumiy buzilishlar vayuborish joyidagi buzilishlar

Inyeksiya qilingan qoʻlni toʻliq shishi:

1 – faqat buster doza yuborilganda

2 – juda tez-tez buster doza yuborilganda

3 – xujayrasiz koʻkyoʻtal vaksinasi bilan vaksinatsiya kursini oʻtgan bolalarda, butunxujayrali vaksina bilan birlamchi vaksinatsiya kursini oʻtgan bolalarga nisbatan, buster doza yuborilgandan keyin yuborish joyida shish rivojlanishining katta ehtimoli kuzatilgan. Inyeksiya qilingan joyda shish (50 mm dan katta) va diffuz shish (muvofiq ravishda “juda tez-tez” yoki “tez-tez”) buster doza 4 yoshdan 6 yoshgacha boʻlgan bolalarga yuborilganda koʻproq paydo boʻladi. Bu reaksiyalar oʻrtacha 4 kun davomida mustaqil oʻtib ketadi.

4 – boʻgʻma va qoqshol anatoksinlarini saqlovchi vaksinalar uchun taʼriflangan.

 

Qoʻllash mumkin boʻlmagan holatlar

Infanriks^TM vaksinasini anamnezida vaksinaning komponentlaridan birontasiga oʻta yuqori sezuvchanligi boʻlgan shaxslarga, shuningdek Infanriks^TM vaksinasi yoki boʻgʻma-qoqshol, yoki boshqa xar qanday butunxujayrali koʻkyoʻtal-boʻgʻma-qoqshol vaksinasi (DTPw) ni oldingi yuborishdan keyin oʻta yuqori sezuvchanlik simptomlari paydo boʻlgan patsiyentlarga yuborish mumkin emas.

Infanriks^TM vaksinasini anamnezdagi koʻkyoʻtal komponentini saqlovchi vaksinani oldingi yuborilishidan keyin 7 kun davomida rivojlangan nomaʼlum etiologiyali ensefalopatiya simptomlari boʻlgan bolalarga yuborish mumkin emas. Bunday hollarda vaksinatsiya kursini boʻgʻma-qoqshol vaksinasi bilan davom ettirish kerak.

 

Dorilarning oʻzaro taʼsiri

Infanriks^TM vaksinasini boshqa bolalar vaksinalarini yuborishdan qatʼiy nazar, istalgan vaqtda yuborish mumkin.

Infanriks^TM vaksinasini bir shprisda Xiberiks^TM vaksinasi (Heamophilus influenzae b (Hib) tur vavksinasiga qarshi) yoki boshqa PRP-T Hib vaksinalari (qoqshol anatoksini bilan konʼyugatsiyalangan Heamophilus influenzae b tur kapsulyar polisaxarid saqlaydi) bilan bir shprisda aralashtirish mumkin.

Turli inyeksion vaksinalarni tananing turli joylariga yuborish kerak.

Immunosupressiv davolash kursi oʻtayotgan yoki immuntanqisligi boʻlgan patsiyentlarda, adekvat immun javobiga erisha olmaslik kuzatilishi mumkin.

Nomutanosiblik

Infanriks^TM vaksinasini Xiberiks^TM vaksinasi yoki boshqa PRP-T Hib vaksinalardan tashqari, boshqa vaksinalar bilan aralashtirish mumkin emas.

 

Maxsus koʻrsatmalar

Vaksinatsiya oldidan vaksinalarni oldingi yuborishga va u bilan bogʻliq boʻlgan nojoʻya reaksiyalar yuz berganiga alohida eʼtibor berib, bolaning anamnezini oʻrganish, shuningdek klinik tekshiruvni oʻtkazish kerak.

Boshqa vaksinalar bilan boʻlgani kabi, bolada tana haroratini oshishi bilan kechuvchi oʻtkir kasallik boʻlganida Infanriks^TM vaksinasini yuborishni kechiktirish kerak. Yengil shakildagi infeksion kasallik vaksinatsiya uchun qarshi koʻrsatma boʻlmaydi.

Agar quyida sanab oʻtilgan nojoʻya reaksiyalardan birontasi xujayrasiz va butunxujayrali AKDS vaksinalarini yuborish bilan vaqtinchalik aloqasi boʻlsa, koʻkyoʻtalli komponentni saqlovchi vaksinalarning keyingi dozalarini yuborishning maqsadga muvofiqligi masalasini sinchiklab koʻrib chiqish kerak. Ayrim hollarda, masalan, koʻkyoʻtal bilan kasallanish darajasi juda yuqori boʻlsa, potensial foyda barcha mumkin boʻlgan xavflardan ustun boʻlsa, ayniqsa agar xavflar turgʻun oqibatlar bilan bogʻliq boʻlmasa, vaksinatsiyani oʻtkazish mumkin.

Ilgari butunxujayrali AKDS vaksinalarini yuborishga qarshi koʻrsatmalar hisoblangan quydagi holatlar, hozir ehtiyotkorlikning umumiy choralari sifatida qaralishi mumkin:

• vaksinani yuborishdan tashqari, boshqa sabablar bilan bogʻliq boʻlmagan vaksinatsiyadan keyingi 48 soat davomidagi ≥ 40,5^oS harorat;
• vaksina yuborilganidan keyin 48 soat davomida rivojlangan kollaps yoki shoksimon holat (gipotonik-giporeaktiv epizod);
• vaksina yuborilganidan keyin 48 soat davomida paydo boʻlgan va 3 soat va koʻproq davom etuvchi uzuluksiz toʻxtamaydigan yigʻi;
• vaksinatsiyadan keyin 3 sutka davomida paydo boʻlgan, isitma holati bilan kechuvchi yoki birga kechmaydigan tirishishlar.

Avj olib boruvchi nevrologik buzilishlar, shu jumladan infantil spazmlar, nazorat qilib boʻlmaydigan tutqanoq yoki avj olib boruvchi ensefalopatiyasi boʻlgan bolalarda koʻkyoʻtalli komponenti boʻlgan (butunxujayrali yoki xujayrasiz) vaksinani yuborishni patsiyentning ahvoli barqarorlangunicha kechiktirish kerak. Lekin koʻkyoʻtalli komponenti boʻlgan vaksinani buyurish haqidagi qaror, xar bir xususiy xolatda, foyda va xavflarni sinchiklab baxolangandan keyin qabul qilinishi kerak.

Anamnezda febril tirishishlar, shuningdek oilaviy anamnezda tirishishlarni mavjudligi qoʻllash mumkin boʻlmagan holat hisoblanmaydi.

OITV-infeksiyasi vaksinatsiyaga qarshi koʻrsatma hisoblanmaydi.

Boshqa inyeksion vaksinalar bilan boʻlgani kabi, Infanriks^TM vaksinasi yuborilganda, vaksinalarni yuborishga anafilaktik reaksiyalar paydo boʻlganida talab qilinishi mumkin boʻlgan vositalar mavjud boʻlishi kerak. Shuning uchun vaksinatsiya qilingan bemorlar immunizatsiyadan keyin 30 minut davomida tibbiy kuzatuv ostida boʻlishi kerak.

Boshqa barcha boʻgʻma, koʻkyoʻtal va qoqshol vaksinalari bilan boʻlgani kabi, Infanriks^TM vaksinasini chuqur mushak ichiga yuborish va yaxshisi vaksinatsiya kursi davomida yuborish joyini almashtirish kerak.

Infanriks^TM vaksinasini trombotsitopeniyasi yoki qon ivish tizimining buzilishlari boʻlgan patsiyentlarda ehtiyotkorlik bilan qoʻllash kerak, chunki bunday patsiyentldarda mushak ichiga inyeksiya qon ketishining sababi boʻlishi mumkin.

Infanriks^TM vaksinasini xech qanday vaziyatlarda vena ichiga yuborish mumkin emas.

Apnoening potensial xavfini hisobga olib va muddatidan oldin tugʻilgan (gestatsiyaning ≤28 haftasi) bolalarda va ayniqsa anamnezida reapirator distress-sindromi boʻlgan bolalarda birlamchi vaksinatsiya kursini oʻtkazishda, 48-72 soat davomida nafas faoliyatini monitoringini oʻtkazish kerak. Bu guruh bolalarda vaksinatsiyaning zarurligi tufayli, vaksinatsiyani kechiktirish yoki uni oʻtkazishni rad etish mumkin emas.

Vaksinani inyeksion yoʻli bilan yuborishga ruhiy reaksiya sifatida vaksinatsiyadan keyin darxol yoki xatto vaksinatsiyagacha xushdan ketish holati (sinkope) rivojlanishi mumkin, shu boisdan patsiyent yiqilganida yuz berishi mumkin boʻlgan lat yeyishlar va jarohatlarni oldini olish kerak.

Homiladorlik va laktatsiya davrida qoʻllanishi

Infanriks^TM vaksinasi kattalarni vaksinatsiya qilish uchun moʻljallanmaganligi tufayli, homiladorlik va laktatsiya davrida uni qoʻllash haqida, shuningdek xayvonlarda reproduktiv faoliyatni oʻrganish yuzasidan maʼlumotlar mavjud emas.

Transport vositalari va potensial xavfli mexanizmlarni boshqarish qobiliyatiga taʼsiri

Qoʻllash mumkin emas.

Preparatni yaroqlilik muddati oʻtganidan soʻng qoʻllash mumkin emas va bolalar olaolmaydigan joyda saqlash kerak.

 

Dozani oshirib yuborilishi

Dozani oshirib yuborilish hollari postmarketing kuzatuv davomida qayd etilgan. Dozani oshirib yuborilishi sababli yuz bergan nojoʻya reaksiyalar, vaksinaning tavsiya etilgan dozalari yuborilgandagi nojoʻya reaksiyalarga oʻxshash boʻlgan.

 

Chiqarilish shakli

Inyeksiya uchun suspenziya, 1 doza – 0,5 ml

0,5 ml dan (1 doza) oldindan toʻldirilgan 1 turdagi neytral shisha (Ph Eur.) shprisda. Shprisning burunchasi butilkauchuk tiqin bilan berkitilgan.

1 oldindan toʻldirilgan shpris qalpoqchadagi 1 igna bilan birga kontur uyali oʻramda (blister).

1 blisterdan qoʻllash boʻyicha yoʻriqnomasi bilan birga karton qutida.

 

Saqlash sharoiti

+2^oS dan +8^oS gacha haroratda saqlansin. Yorugʻlikdan himoyalangan joyda saqlansin.

MUZLATILMASIN. Agar vaksina muzlagan boʻlsa, shprisni tashlab yuborish kerak.

 

Yaroqlilik muddati

36 oy.

Vaksinaning yaroqlilik muddatini tugash sanasi etiketkasi va oʻramida koʻrsatilgan.

 

Dorixonalardan berish tartibi

Retsept boʻyicha.

 

192800cookie-checkInfanriksno