Plakvenil ( gidroksixloroxin, hydroxychloroquine ) haqida ma’lumot

QOʻLLASH BOʻYICHA YOʻRIQNOMA

 

PLAKVЕNIL^®

PLAQUENIL^®

 

Preparatning savdo nomi: Plakvenil^® (Plaquenil^®)

Taʼsir qiluvchi modda (XPN): gidroksixloroxin

Dori shakli: plyonka qobiq bilan qoplangan tabletkalar.

Tarkibi

Bir tabletkada quyidagilar saqlanadi:

Faol modda: gidroksixloroxin sulfati – 200 mg;

Yordamchi moddalar: laktoza monogidrati, povidon (K25), makkajoʻxori kraxmali, magniy stearati, Opadray OY-L-28900 (gipromelloza, titan dioksidi (Ye171), makrogol-4000, laktoza monogidrati, tozalangan suv).

Taʼrifi: dumaloq, ikki tomonlama qavariq, oq rangli qobiq bilan qoplangan, tomonlarning birida “HCQ” va boshqa tomonida “200” gravirovkasi boʻlgan tabletkalar.

Farmakologik guruhi: bezgakka qarshi vosita.

ATX kodi: R01VA02.

 

Farmakologik xususiyatlari

Plakvenil^® bezgakka qarshi xususiyatlarga ega va shuningdek surunkali diskoid yoki tizimli qizil yugirik (TQYU) va oʻtkir va surunkali revmatoid artritda (RA) yalligʻlanishga qarshi va immunodepressiv taʼsir koʻrsatadi. Bezgak, qizil yugurik va revmatoid artritda uning taʼsir mexanizmi oxirigacha maʼlum emas.

Gidroksixloroxin revmatoid omil va oʻtkir bosqichdagi reaksiya komponentlarining sintezini bostirib, oʻrtacha immunosupressor xususiyatlariga ega. U shuningdek lizosomal membranalarni barqarorlashtirib, leykotsitlarda toʻplanadi va koʻpgina fermentlar, shu jumladan togʻayni parchalanishini chaqiruvchi kollagenaza va proteazalarning faolligini susaytiradi.

TQYU va RA dagi samaradorligi gidroksixloroxinning quyidagi yalligʻlanishga qarshi va immunomodulyatorlik samaralari bilan bogʻliq:

• xujayra ichida rN oshishi antigen javobni sekinlashishiga olib keladi va gistomutanosiblikning asosiy majmuasi (GAM) retseptorlari tomonidan peptidlarni bogʻlanishi kamayadi. Antigen-GAM retseptorlarining kam miqdori xujayra yuzasiga yetadi, bu autoimmun javobni pasayishiga olib keladi;
• yuqori konsentratsiyalarda fosfolipaza A2, lizosomal fermentlarning faolligini kamaytirishi;
• autoimmun javobning klinik va laborator koʻrsatkichlarini kamayishiga olib keluvchi IL-1 va IL-6 sitokinlar konsentratsiyasini kamaytirishi. Interferon gamma sintezini buzilishi yoʻqligi sababli, bu samaralar sitokinlarga selektiv taʼsiri bilan bogʻliq boʻlishi mumkin;
• DNK va RNK pre- va/yoki post-transkripsiyasini ingibirlanishi bilan bogʻliq.

Preparat yetilmagan eritrotsit shakllari, shuningdek yetilmagan shakllari bilan bir vaqtda qondan yoʻq boʻluvchi P. vivax va P. malariae gametalarini faol susaytiradi. Plakvenil^® P. falciparum gametalariga taʼsir qilmaydi. Plakvenil^® xloroxinga rezistent P. falciparum shtammlariga nisbatan samarasiz, shuningdek P. vivax, P. malariae va P. ovale ning eritrotsitlardan tashqaridagi shakllariga nisbatan samarasiz va shuning uchun uni profilaktika maqsadida buyurilganda ushbu mikroorganizmlar bilan zararlanishni, shuningdek ushbu qoʻzgʻatuvchilar chaqirgan kasalliklarni qaytalanishini oldini olaolmaydi.

 

Farmakokinetikasi

Ichga qabul qilingandan keyin gidroksixloroxin tez va deyarli toʻliq soʻriladi. Sogʻlom koʻngillilarda 400 mg bir martalik dozadan keyin gidroksixloroxinning plazmadagi maksimal konsentratsiyasiga 1,83 soatdan keyin erishilgan va 53 dan 208 mg/ml gacha oʻzgargan. Plazma oqsillari bilan bogʻlanishi – 45% ni tashkil qiladi. Plazmadan yarim chiqarilish davrining oʻrtacha qiymati, preparatni qabul qilingandan keyin oʻtgan vaqtga bogʻliq holda quyidagicha oʻzgaradi: 5,9 soat (plazmadagi maksimal konsentratsiyasi (S_max) ga erishilguncha 10 soatgacha) 26,1 soat (10 soatdan 48 soatgacha) va 299 soat (48 soatdan 504 soatgacha). Jigarda qisman etilirlangan metabolitlariga aylanadi. Oʻzgarmagan preparat va uning metabolitlari organizmda yaxshi taqsimlanadi. Taqsimlanish hajmi 5-10 l/kg ni tashkil qiladi. Preparat yuqori almashinish darajasi bilan toʻqimalarda (jigar, buyrak, oʻpka, taloqda – bu aʼzolarda konsentratsiyasi plazmadagi konsentratsiyasidan 200-700 marta yuqori boʻladi; MNT, eritrotsit, leykotsitlarda), shuningdek koʻz toʻr pardasi va melaninga boy toʻqimalarda toʻplanadi. Gidroksixloroxin va uning metabolitlari asosan siydik bilan va kamroq darajada safro bilan chiqariladi. Preparat sekin chiqariladi, terminal yarim chiqarilish davri taxminan 50 kunni (qondan) va 32 kunni (plazmadan) tashkil qiladi.

24 soat davomida preparatning yuborilgan dozasining 3% chiqariladi.

Gidroksixloroxin yoʻldosh toʻsigʻi orqali oʻtadi va oz miqdorda koʻkrak sutida aniqlanadi.

 

Qoʻllanilishi

• Revmatoid artrit; yuvenil revmatoid artrit; qizil yugurik (tizimli va diskoid).
• Bezgak ( falciparum ning xloroxin-rezistent shtammlaridan tashqari):
• Plasmodium vivax, P. ovale va malariae, shuningdek P. falciparum ning sezgir shtammlari chaqirgan bezgakning oʻtkir xurujlarini oldini olish va davolash;
• falciparum ning sezgir shtammlari chaqirgan bezgakni radikal davolash uchun qoʻllanadi.

 

Qoʻllash usuli va dozalari

IZOH: Barcha dozalar gidroksixloroxin sufati uchun keltirilgan va asos uchun dozalarga ekvivalent emas!

Preparat faqat ichga qabul qilinadi. Har bir dozani ovqatlanish vaqtida yoki bir stankan sut bilan qabul qilish kerak.

RA ni davolash

Gidroksixloroxin toʻplanish faolligiga ega. Uning terapevtik taʼsiri namoyon boʻlishi uchun preparatni bir necha xafta qabul qilish talab etiladi, ayni vaqtda nojoʻya samaralar nisbatan erta namoyon boʻlishi mumkin. Zarur terapevtik samara preparatni bir necha oy qabul qilgandan keyin rivojlanadi. Gidroksixloroxinni qabul qilishning 6 oy davomida bemorning holatida obyektiv yaxshilanish kuzatilmagan hollarda preparatni qabul qilishni toʻxtatish kerak.

Kattalar (shu jumladan, keksa yoshli shaxslar)

Minimal samarali dozalarni qoʻllash kerak. Ular sutkada tana vazniga (real tana vazni emas, balki “ideal” tana vazni boʻyicha hisoblanadi) 6,5 mg/kg dan oshmasligi kerak va sutkada 200 yoki 400 mg ni tashkil qilishi mumkin.

Har kuni 400 mg qabul qilaoladigan patsiyentlarda

Har kuni 400 mg dan dastlab bir necha qabullarga boʻlingan holda buyuriladi. Holatning aniq yaxshilanishiga erishish uchun doza 200 mg gacha kamaytirilishi mumkin. Samara kamayganida tutib turuvchi doza 400 mg gacha oshirilishi mumkin.

Bolalar

Minimal samarali dozani qoʻllash kerak. Doza tana vazniga (“ideal” tana vaznidan kelib chiqib) 6,5 mg/kg dan oshmasligi kerak. Shuning uchun tana vazni 31 kg dan kam boʻlgan bolalar uchun 200 mg li tabletkalar toʻgʻri kelmaydi.

RA ni majmuaviy davolash uchun Plakvenil^® preparatini qoʻllash

Plakvenil^® glyukokortikosteroidlar, salitsilatlar, nosteroid yalligʻlanishga qarshi preparatlar, metotreksat va boshqa ikkinchi qator terapevtik vositalar bilan birga xavfsiz qoʻllanishi mumkin. Plakvenil^® preparatini bir necha hafta qoʻllangandan keyin glyukokortikosteroidlar va salitsilatlarning dozasi kamaytirilishi yoki bu preparatlarni qabul qilishni toʻxtatish mumkin. Glyukokortikosteroidlarning dozalari har 4-5 kunda asta-sekin kamaytirilishi kerak: kortizonning dozasi – 5-15 mg dan, gidrokortizonning dozasini – 5-10 mg dan, prednizolon va prednizonning dozasi – 1-
2,5 mg dan, metilprednizolon va triamsinolonning dozasi – 1-2 mg dan va deksametazonning dozasi – 0,25-0,5 mg dan ortiq boʻlmasligi kerak.

TQYU ni davolash

Kattalarda dastlabki oʻrtacha dozasi sutkada 1 yoki 2 marta 400 mg ni tashkil qiladi. U patsiyentning reaksiyasiga bogʻliq holda bir necha xafta yoki bir necha oy davomida buyurilishi kerak. Uzoq muddatli tutib turuvchi davolash uchun preparatni 200 dan 400 mg gacha boʻlgan kamroq dozada qoʻllash yetarli.

Bezgakni davolash

1. malariae va P. falciparum ning sezgir shtammlari chaqirgan bezgakning oʻtkir xurujlarini oldini olish

Kattalar uchun – har hafta haftaning aynan bir kuni har kuni 400 mg buyuriladi.

Bolalar uchun har kunlik doza tana vazniga (aniqlash uchun “ideal” tana vazni olinadi)
6,5 mg/kg ni tashkil qiladi, ammo, tana vaznidan qatʼiy nazar, u kattalar uchun belgilangan dozadan oshmasligi kerak.

Agar sharoit toʻgʻri kelsa, profilaktik davolashni endemik hududga joʻnab ketishdan 2 hafta oldin buyurish kerak. Agar buning iloji boʻlmasa, ikki barobar dozani buyurish mumkin: kattalarga – 800 mg, bolalarga – “ideal” tana vazniga 12,9 mg/kg doza (lekin,
800 mg ortiq emas), 6 soatlik interval bilan ikki qabulga boʻlingan. Profilaktik davolashni endemik hududdan joʻnab ketgandan keyin 8 hafta davomida davom ettirish kerak.

Bezgakning oʻtkir xurujlarini davolash

Kattalar uchun 800 mg boshlangʻich dozadan keyin olti yoki sakkiz soatdan keyin 400 mg buyuriladi, soʻngra keyingi ikki kun davomida 400 mg dan (umuman 2 g gidroksixloroxin sulfati) buyuriladi.

Davolashning muqobil usuli: shuningdek 800 mg ni bir marta qabul qilishning samaradorligi ham isbotlangan.

Kattalar uchun doza ham bolalar uchun hisoblanganidek “ideal” tana vazni boʻyicha hisoblanishi mumkin (quyiga qarang).

Bolalar uchun umumiy doza “ideal” tana vazniga 32 mg/kg (ammo 2 g dan yuqori emas) uch kun davomida quyidagicha buyuriladi:

birinchi doza: tana vazniga 12,9 mg/kg (bir martalik qabul qilish 800 mg dan yuqori emas);

ikkinchi doza: tana vazniga 6,5 mg/kg (400 mg dan yuqori emas) birinchi dozadan 6 soatdan keyin;

uchinchi doza: 6,5 mg/kg (400 mg dan yuqori emas) ikkinchi dozadan 18 soatdan keyin;

toʻrtinchi doza: 6,5 mg/kg (400 mg dan yuqori emas) uchinchi dozadan 24 soatdan keyin buyuriladi.

1. malariae va P. vivax chaqirgan bezgakni radikal davolash
2. malariae va P. vivax chaqirgan bezgakni radikal davolash uchun bir vaqtda 8-aminoxinolon hosilalarini qabul qilish kerak.

 

Nojoʻya taʼsirlari

• Qon va limfatik tizimi tomonidan buzilishlar

Suyak koʻmigida qon yaratilishini bostirilishi, anemiya, aplastik anemiya, agranulotsitoz, leykopeniya va trombotsitopeniya.

• Immun tizimi tomonidan buzilishlar

Eshakemi, angionevrotik shish, bronxospazm.

• Moddalar almashinuvi va oziqlanish tomonidan buzilishlar

Anoreksiya, psoriaz zoʻrayishi mumkin.

– Ruhiyatni buzilishi

Asabiylik, emotsional oʻzgaruvchanlik, psixozlar, suitsidal hatti-harakatlar.

– Nerv tizimi tomonidan buzilishlar

Bosh aylanishi, bosh ogʻrigʻi, tirishishlar, ataksiya.

– Koʻrish aʼzosi tomonidan buzilishlar

Pigmentatsiyani oʻzgarishi va koʻrish maydonlaridagi nuqsonlar bilan kechuvchi retinopatiya rivojlanishi mumkin. Erta shaklda bu koʻrinishlar gidroksixloroxinni qabul qilish toʻxtatilganidan keyin odatda qaytuvchan boʻladi. Agar bu holat aniqlanmasdan qolsa va koʻz toʻr pardasini shikastlanishini rivojlanishi davom etsa, bunda hatto preparatni bekor qilgandan keyin ham ularni avj olishi xavfi paydo boʻlishi mumkin.

Makulopatiya va makulyar degeneratsiya holatlari haqida xabar berilgan, ular qaytmas boʻlishi mumkin.

Koʻz toʻr pardasidagi oʻzgarishlar dastlab simptomsiz boʻlishi mumkin yoki paratsentral yoki peritsentral turdagi skotoma, oʻtuvchan skotoma va rang ajratishni buzilishi bilan namoyon boʻlishi mumkin.

Koʻzning muguz pardasini oʻzgarishi, shu jumladan shish va xiralashishi mumkin. Ular simptomsiz boʻlishi yoki oreolalarni paydo boʻlishi, koʻrishni noaniqligi yoki fotofobiya kabi koʻrishni buzilishlarini chaqirishi mumkin. Davolash toʻxtatilganida bu oʻzgarishlar ortga qaytishi mumkin. Shuningdek dozaga bogʻliq va qaytuvchan boʻlgan akkomodatsiyani buzilishlari bilan bogʻliq koʻrishni buzilishlari paydo boʻlishi mumkin.

• Eshitish aʼzosi tomonidan buzilishlar va labirint buzilishlari

Vertigo, quloqda shovqin, eshitishni yoʻqolishi.

• Yurak-tomir tizimi tomonidan buzilishlar

Kardiomiopatiya.

Oʻtkazuvchanlikni buzilishi (Gis tutami oyoqchalari blokadasi/atrioventrikulyar oʻtkazuvchanlikni buzilishlari), shuningdek ikkala yurak qorinchalari gipertrofiyasida surunkali kardial toksiklik gumon qilinishi mumkin. Preparat bekor qilinganda bu oʻzgarishlar ortga qaytishi mumkin.

• Meʼda-ichak yoʻllari tomonidan buzilishlar

Koʻngil aynishi, diareya, qorinda ogʻriq va qusish. Bu simptomlar odatda preparatning dozasi kamaytirilganda yoki bekor qilinganda darhol oʻtib ketadi.

• Jigar va oʻt chiqarish yoʻllari tomonidan buzilishlar

“Jigar” transaminazalari faolligini oshishi; jigar yetishmovchiligi, shu jumladan bir necha holatlarda toʻsatdan rivojlangan jigar yetishmovchiligi kuzatilgan.

– Teri qoplamalari tomonidan buzilishlar

Teri toshmalari kuzatilgan; shuningdek qichishish, teri va shilliq qavatlari pigmentatsiyasini oʻzgarishi, sochni rangsizlanishi va alopetsiya haqida xabar berilgan. Bu oʻzgarishlar odatda davolash toʻxtatilganidan keyin tez oʻtib ketadi. Bullyoz toshma rivojlanishi, shu jumladan koʻp shaklli eritema, Stivens-Djonson sindromi, toksik epidermal nekroliz, fotosezuvchanlik va eksfoliativ dermatitning juda kam uchraydigan hollari haqida xabar berilgan.

Garchi gidroksixloroxin psoriazni zoʻrayishini chaqirishi mumkin boʻlsada, oʻtkir tarqalgan ekzantematoz pustulyoz (OʻTEP) juda kam hollarini psoriazdan farqlash lozim. OʻTEP tana haroratini oshishi va giperleykotsitoz bilan birga kechishi mumkin. Preparat bekor qilinganidan keyin natija odatda ijobiy hisoblanadi.

• Skelet-mushak va biriktiruvchi toʻqima tomonidan buzilishlar

Proksimal mushak guruhlarini avj oluvchi kuchsizligi va atrofiyasiga olib boruvchi skelet mushaklari miopatiyasi yoki neyromiopatiyasi kuzatiladi.

Miopatiya preparat bekor qilinganidan keyin qaytuvchan boʻlishi mumkin, ammo toʻliq tiklanish uchun bir necha oy talab etilishi mumkin.

Bir vaqtning oʻzida kuchsiz sensor oʻzgarishlar, pay reflekslarini susayishi va nerv oʻtkazuvchanligini pasayishi kuzatilishi mumkin.

 

Qoʻllash mumkin boʻlmagan holatlar

• Gidroksixloroxin, 4-aminoxinolin va preparatning har qanday boshqa komponentiga oʻta yuqori sezuvchanlik.
• Retinopatiya, shu jumladan anamnezidagi makulopatiya.
• Bolalar va uzoq muddat davolash zarurati boʻlganida (bolalarda toksik samaralar rivojlanishini yuqori xavfi mavjud).
• 6 yoshgacha boʻlgan bolalar (200 mg dan tabletkalar 35 kg dan kam boʻlgan “ideal” tana vaznli bolalar uchun moʻljallanmagan).
• Homiladorlik (“Homiladorlik va laktatsiya” boʻlimiga qarang).
• Laktozani nasliy oʻzlashtiraolmaslik (laktaza yetishmovchiligi), galaktozemiya yoki glyukoza/galaktozani malabsorbsiya sindromida (preparatning tarkibida laktoza mavjudligi sababli) qoʻllash mumkin emas.

Ehtiyotkorlik bilan

• Koʻrishni buzilishlarida (koʻrish oʻtkirligini pasayishi, rang ajratishni buzilishi, koʻruv maydonini torayishi), noxush oftalmologik reaksiyalarni chaqirishi mumkin boʻlgan preparatlarni bir vaqtda qabul qilinganda (retinopatiya va koʻrishni buzilishlarini avj olishi xavfi).
• Gematologik kasalliklarda (shu jumladan, anamnezdagi).
• Ogʻir nevrologik kasalliklarda, psixozlarda (shu jumladan, anamnezdagi).
• Kechki teri porfiriyasida (zoʻrayish xavfi, psoriazda (kasallikning teri koʻrinishlarini kuchayishi xavfi) teri reaksiyalarini chaqirishi mumkin boʻlgan preparatlarni bir vaqtda qabul qilinganda.
• Buyrak yetishmovchiligi va/yoki jigar yetishmovchiligida, gepatitda, jigar va/yoki buyrak faoliyatiga noxush taʼsir qilishi mumkin boʻlgan preparatlarni bir vaqtda qabul qilinganda (buyrak yoki jigar faoliyatini ogʻir darajali buzilishlarida doza gidroksixloroxinning plazmadagi konsentratsiyasini nazorati ostida tanlanishi kerak).
• Glyukozo-6-fosfatdegidrogenaza tanqisligida.
• Ogʻir meʼda-ichak kasalliklarida.
• Xininga oʻta yuqori sezuvchanlikda (kesishgan allergik reaksiyalar boʻlishi mumkin) ehtiyotkorlik bilan qoʻllash kerak.

 

Dorilarning oʻzaro taʼsiri

Digoksin bilan

Gidroksixloroxin digoksinning plazmadagi konsentratsiyasini oshirishi mumkinligi haqida xabar berilgan, shuning uchun ushbu preparatlarni bir vaqtda qabul qilinganda glikozid intoksikatsiyasini rivojlanishidan saqlanish uchun digoksinning plazmadagi konsentratsiyasini nazorati ostida digoksinning dozasini kamaytirish kerak.

Qandli diabetni davolash uchun qoʻllanadigan preparatlar bilan

Gidroksixloroxin insulin va peroral gipoglikemik vositalarning samarasini kuchaytirishi mumkinligi sababli, gidroksixloroxinni qabul qilishni boshida ushbu gipoglikemik preparatlarning dozasini kamaytirish talab etilishi mumkin.

 

Antatsidlar bilan

Antatsidlar gidroksixloroxinning soʻrilishini kamaytirishi mumkin. Shuning uchun antatsidlar va gidroksixloroxinni bir vaqtda qoʻllaganda ularni qabul qilish orasidagi interval kamida 4 soatni tashkil qilishi kerak.

Shuningdek xloroxin uchun taʼriflangan, ammo gidroksixloroxinni qabul qilishda xali kuzatilmagan boshqa dori vositalari bilan quyida sanab oʻtilgan oʻzaro taʼsirlarni gidroksixloroxinda inkor etib boʻlmaydi.

Aminoglikozidlar bilan

Ularning nerv-mushak oʻtkazuvchanligiga bevosita bloklovchi taʼsirini potensiyalaydi.

Simetidin bilan

Simetidin bezgakka qarshi preparatlarning metabolizmini bostiradi, bu ularning plazmadagi konsentratsiyasini oshishi va ularning nojoʻya samaralari, ayniqsa toksik samaralarining xavfini oshirishi mumkin.

Neostigmin va piridostigmin bilan

Taʼsirning antagonizmi kuzatiladi.

Har qanday intradermal odam diploid-xujayraviy qutirishga qarshi vaksinasi bilan

Intradermal odam diploid-xujayraviy qutirishga qarshi vaksinasi bilan birlamchi immunizatsiyaga javoban antitelalarni hosil boʻlishi kamayadi.

 

Maxsus koʻrsatmalar

Umumiy

Koʻz toʻr pardasiga toksik taʼsiri ahamiyatli darajada dozaga bogʻliq hisoblanadi. “Ideal” tana vazniga 5,5 mg/kg dozada qoʻllanganda retinopatiyani paydo boʻlishi tez-tezligi yuqori emas. Tavsiya etilgan sutkalik dozani oshirish retinopatiya rivojlanishi xavfini haddan tashqari oshiradi.

Preparat bilan davolashning uzoq muddatli kursidan oldin ikkala koʻzni sinchkovlik bilan tekshiruvdan oʻtkazish kerak. Tekshirish koʻrish oʻtkirligi, koʻz tubini tekshirish, rang ajratish va koʻruv maydonini baholashni oʻz ichiga olishi kerak. Davolash vaqtida bunday tekshirish kamida 6 oyda 1 marta oʻtkazilishi kerak.

Tekshirish quyidagi hollarda koʻproq amalga oshirilishi kerak:

• “ideal” tana vazniga 6,5 mg/kg dan yuqori sutkalik dozada (semiz patsiyentlarda hisoblash uchun mutloq tana vaznini ishlatish dozani oshirib yuborilishiga olib kelishi mumkin);
• buyrak yetishmovchiligida;
• 200 g dan yuqori umumiy dozada;
• keksa yoshli shaxslarda;
• koʻrish oʻtkirligi pasayganda.

Koʻrishni har qanday buzilishlari (koʻrish oʻtkirligini pasayishi, rang ajratishni oʻzgarishi) paydo boʻlganida preparatni darhol bekor qilish va patsiyentning koʻrishini sinchkovlik bilan kuzatish kerak, chunki koʻz toʻr pardasini oʻzgarishi (va koʻrishni buzilishi) hatto preparatni bekor qilgandan keyin ham avj olishi mumkin (“Nojoʻya taʼsirlari” boʻlimiga qarang).

Preparatning dozasini kamaytirishni talab etishi mumkin boʻlgan jigar va buyrak kasalliklari boʻlgan patsiyentlarda, shuningdek bu aʼzolarga noxush taʼsir qilishi mumkin boʻlgan dori preparatlarini qabul qilayotgan patsiyentlarda gidroksixloroxinni qoʻllaganda ehtiyotkorlikka rioya qilish tavsiya etiladi.

Preparatni uzoq muddat qabul qilayotgan patsiyentlarda qonning toʻliq tahlilini davriy ravishda takrorlash kerak (gematologik buzilishlar paydo boʻlganida gidroksixloroxinni bekor qilish kerak).

4-aminoxinolinlarning toksik taʼsiriga, ayniqsa bolalar sezgir, shuning uchun gidroksixloroxin bolalar olaolmaydigan joyda saqlanishiga sinchkovlik bilan eʼtibor berish kerak.

Preparatni uzoq muddat qabul qilayotgan barcha patsiyentlar skelet mushaklarining faoliyati va pay reflekslarining yaqqolligi boʻyicha nevropatologda davriy ravishda tekshirilishlari kerak. Mushaklarda kuchsizlik paydo boʻlganida preparatni bekor qilish kerak.

Juda kam hollarda gidroksixloroxin qabul qilgan patsiyentlarda suitsidal hatti-harakatlar haqida xabar berilgan.

Bezgakda

Plakvenil^® xloroxinga chidamli P. falciparum shtammlariga nisbatan samarasiz, shuningdek P. vivax, P. malariae va P. ovale ning eritrotsitlardan tashqaridagi shakllariga nisbatan samarasiz va shuning uchun uni profilaktika maqsadida buyurilganda ushbu mikroorganizmlar bilan zararlanishni, shuningdek ushbu qoʻzgʻatuvchilar chaqirgan kasalliklarni qaytalanishini oldini olaolmaydi.

Homiladorlik va laktatsiya

Gidroksixloroxin yoʻldosh orqali oʻtadi. Uni homiladorlik vaqtida qoʻllash boʻyicha maʼlumotlar cheklangan. Shuni taʼkidlash kerak-ki, 4-aminoxinolinlar terapevtik dozalarda homilaning markaziv nerv tizimi, shu jumladan eshitish nervini shikastlashi (eshitish va vestibulyar apparat tomonidan buzilishlar, tugʻma karlik), koʻz toʻr pardasiga qon quyilishi va koʻz toʻr pardasining anomal pigmentatsiyasini chaqirishi mumkin. Shuning uchun gidroksixloroxinni ona uchun potensial foyda homila uchun xavfdan yuqori boʻlgan hollardan tashqari homiladorlikda qoʻllashdan saqlanish kerak.

Emizish vaqtida preparatni qoʻllash zarurati sinchkovlik bilan baholanishi kerak, chunki u kam miqdorda ona sutiga ajralishi, kichik bolalar esa, 4-aminoxinolinlarning toksik samaralariga ayniqsa sezuvchanligi koʻrsatilgan.

Avtomobilni boshqarish va yuqori xavf bilan bogʻliq ishlarni bajarish qobiliyatiga taʼsiri

Bemorlar transportni boshqarish yoki diqqatni jamlashni talab etuvchi ishlarni bajarishda ehtiyotkorlikka rioya qilishlari kerak, chunki gidroksixloroxin akkomodatsiyani buzishi va aniq koʻrishni buzishi mumkin. Agar bu holat oʻz-oʻzidan oʻtib ketmasa, doza vaqtincha kamaytirilishi mumkin.

Preparat bolalar olaolmaydigan joyda saqlansin va yaroqlilik muddati oʻtgach qoʻllanilmasin.

 

Dozani oshirib yuborilishi

Simptomlari

4-aminoxinolinlarning dozasini oshirib yuborilishi, ayniqsa bolalarda xavfli, hatto 1-2 g preparat oʻlimga olib kelishi mumkin.

Dozani oshirib yuborilishi simptomlari bosh ogʻrigʻi, koʻrishni buzilishi, kollaps, tirishishlar, gipokaliyemiya, yurak ritmi va oʻtkazuvchanligini buzilishi, shu jumladan QT intervalni uzayishi, “piruet” taxikardiya, yurak qorinchalari taxikardiyasi va yurakni va nafasni toʻsatdan potensial fatal toʻxtatishi bilan yurak qorinchalari fibrillyatsiyasini oʻz ichiga oladi. Dozani oshirib yuborilishida shoshilinch tibbiy kuzatuv talab etiladi, chunki bu asoratlar dozasi oshirib yuborilganidan qisqa vaqtdan keyin rivojlanishi mumkin.

Davolash

Darhol qusishni sunʼiy chaqirish yoki zond orqali meʼdani yuvish kerak. Preparatning qabul qilingan dozasidan kamida 5 marta yuqori dozada faollashtirilgan koʻmir soʻrilishni sekinlashtirishi mumkin. Diazepamni parenteral yuborish maqsadga muvofiq (uning fonida xloroxinning kardiotiksikligini kamayishi taʼriflangan).

Zarurati boʻlganida oʻpkani sunʼiy ventilyatsiyasi va shokka qarshi davolashni oʻtkazish kerak.

Dozani oshirib yuborilishi simptomlari bartaraf etilgandan keyin kamida 6 soat davomida doimiy tibbiy kuzatuvni davom ettirish talab etiladi.

 

Chiqarilish shakli

Plyonka qobiq bilan qoplangan tabletkalar, 200 mg.

10 tabletkadan PVX va alyumin folgali blisterda. 6 blisterdan qoʻllash boʻyicha yoʻriqnomasi bilan karton qutida.

 

Saqlash sharoiti

25^oS dan yuqori boʻlmagan haroratda saqlansin.

 

Yaroqlilik muddati

3 yil.

 

Dorixonalardan berish tartibi

Retsept boʻyicha.

516400cookie-checkPlakvenil ( gidroksixloroxin, hydroxychloroquine ) haqida ma’lumotno